15 лістапада 2012 года у 16.00 у палацы Румянцавых і Паскевічаў адбылося адкрыцце мастацка-літаратурнай выставы з фондаў Дзяржаўнага літаратурнага музея Янкі Купалы "З кутка жаданняў", прысвечанай жыццю і творчасці Янкі Купалы ў кніжнай графікі беларускіх мастакоў.

Выстава прымеркавана да 130-годдзя з дня нараджэння народнага паэта Беларусі Янкі Купалы і Году кнігі. Выстава атрымала назву аднаго з вершаў паэта. Яе экспанаты набліжаюць да наведвальнікаў асобу паэта, адлюстроўваюць сюжэты яго твораў, знаёмяць з іх героямі і персанажамі. Духоўны свет паэзіі Янкі Купалы, асноўныя тэмы яго творчасці - Радзіма, паэт і народ, хараство Беларусі - натхнілі не адно пакаленне беларускіх мастакоў.

Створаныя беларускімі мастакамі цудоўныя ілюстрацыі да кніг Янкі Купалы, што пабачылі свет у розныя гады, увайшлі ў залаты фонд беларускай кніжнай графікі ХХ - пачатку ХХІ стагоддзя.

Экспазіцыя выставы знаёміць з выданнямі Песняра, ілюстрацыі да якіх стварылі беларускія мастакі-графікі: кнігі для дарослых і для дзяцей, рарытэтныя, юбілейныя і ўнікальныя мініяцюрныя выданні розных гадоў.