З 21 ліпеня 2023 г. у Гомельскім палацава-паркавым ансамблі пачне работу выстава «Посцілка: дэкаратыўнае вымярэнне».
Саматканыя посцілкі і дываны - гэта шматгранны элемент беларускай культуры, своеасаблівае вымярэнне, які патрабуе разглядаць яго з розных бакоў, як асобны феномен і частку культурнага кода нацыі.
У традыцыйнай культуры посцілка выконвала шэраг функцый: утылітарную (посцілкамі засцілалі ложак, накрываліся, вешалі на сцяну для ўпрыгожвання інтэр'ера сялянскай хаты, засцілалі выязныя сані і вазкі), дэкаратыўную (посцілка надзелена мастацкімі якасцямі, мае асаблівасці вытворчасці адпаведна матэрыялу, тэхнікі, кампазіцыі, малюнка, арнамента, колеравых спалучэнняў) і абрадавую (у традыцыйнай культуры беларусаў посцілка робіцца атрыбутам вясельнага і пахавальнага абрадаў).
У ХХ ст., асабліва ў савецкі час, менавіта вакол тканага дывана ці роднаснай яму посцілкі фармуецца сялянскі інтэр'ер, складаецца іншая, чым пры традыцыйнай арганізацыі хаты, знакавая прастора жылля вясковага чалавека.
Дэкаратыўнасць саматканых посцілак і дываноў паўплывала на тое, што ў беларускіх сем'ях іх часта выкарыстоўвалі як фотафон пры стварэнні знакавых фотаздымкаў, што таксама робіць гэтыя узорныя вырабы культурным феноменам.
Сёння посцілкі, якія захаваліся ў сем'ях ад бабуль ці прабабуль, для многіх становяцца сапраўнай рэліквіяй, прадметам калекцыянавання, а посцілкі ў музейных зборах складаюць залаты фонд этнаграфічных калекцый і даўно сталі прадметам экспанавання і даследвання.
Выстава «Посцілка: дэкаратыўнае вымярэнне» упершыню пазнаёміць наведвальнікаў Гомельскага палацава-паркавага ансамбля з калекцыяй посцілак з уласнага музейнага фонда, у якім захоўваецца звыш за 100 саматканых посцілак і дываноў. Паходзяць яны пераважна з Гомельшчыны, а таксама з Краснапольскага раёна Магілеўскай вобласці і датуюцца пераважна 1930-1970-мі гг.
Посцілкі - гэта жывы і яркі сусвет, у якім гарманічна спалучаюцца традыцыя і майстэрства, колеры і вобразы, утылітарнасць і невычэрпная дэкаратыўнасць. І каб убачыць новае ў звыклым, трэба проста паглядзець на гэта з іншага боку.
Палац «расквітнее» для вас! Чакаем!