З 15 верасня 2023 г. у цэнтральнай частцы палаца Румянцавых і Паскевічаў пачала працу выстава мастака Анатоля Налівайкі «З глыбiнь натхнення». Увазе наведвальнікаў прадстаўлена каля 60 жывапісных твораў аднаго з самых вядомых мазырскіх жывапісцаў. Ён набыў сабе славу і як майстар, які тонка адчувае прыроду, і як настаўнік, здольны перадаць свой багаты вопыт вучням. Краявіды роднай зямлі, мазырскага Палесся, адлюстраваныя пэндзлем мастака, дыхаюць любоўю і цеплынёй, прыцягваюць погляд і дазваляюць убачыць адметнае ў, здавалася б, штодзённым і простым...

Ужо больш за 40 гадоў Анатоль Мікалаевіч жыве ў Мазыры. Некалі здзіўлены краявідамі Прыпяцкага краю, усе гэтыя гады ён апявае прыгажосць гэтых месцаў у сваіх палотнах. А пачалося ўсё ў далёкім 1981-м годзе, калі ўраджэнец вёскі Паўлаўка Мінскай вобласці Анатоль Налівайка скончыў службу ў арміі і змяніў звыклыя раўнінныя краявіды на дубовыя гаі і яры. Натхніўшыся іх дзівасамі, менавіта тады ён вырашыў напісаць некалькі пейзажаў. Так у яго душы ўспыхнула захапленне, якое стала пасля і прафесіяй, і хобі.
Па словах мастака, у беларускай прыродзе ёсць свая "душа", асаблівы каларыт, які ён перадае з дапамогай яркіх фарбаў і буйных мазкоў. Нярэдка карціны майстра з'яўляюцца падчас выязных пленэраў, калі наваколле можна не проста ўбачыць, але і "прачуць".
Сваімі навыкамі Анатоль Мікалаевіч шчодра дзеліцца з выхаванцамі Мазырскай дзіцячай мастацкай школы. Ён не толькі навучае іх асновам выяўленчай дзейнасці, але і прывівае любоў да мастацтва, выхоўвае ў юных сэрцах дабрыню, павагу да прыроды і вучыць цаніць цудоўнае вакол. Плён яго педагагічных прац не застаўся без увагі: у 2011 годзе Анатоль Мікалаевіч Налівайка быў аб'яўлены пераможцам абласнога конкурсу прафесійнага майстэрства, стаўшы Настаўнікам года.
Творы жывапісца знаходзяцца ў прыватных калекцыях Беларусі, краін блізкага і далёкага замежжа.
Чакаем усіх у палацы Румянцавых і Паскевічаў на выставе жывапісу Анатоля Налівайкі, каб мець магчымасць акунуцца ва ўтульную атмасферу каларытных палескіх краявідаў, якія нараджаюцца ў мастака З ГЛЫБІНЬ НАТХНЕННЯ!

Уваход на выставу па квітках у палац Румянцавых і Паскевічаў.

Кантактны тэлефон куратараў выставы: (0232) 50-95-41