Выстава жывапісу Анатоля Отчыка "На бранскай зямлі"

11 верасня 2013 г. у выставачнай зале цэнтральнай часткi палаца Румянцавых і Паскевічаў адбылося адкрыццё восьмай персанальнай выставы беларускага мастака Анатоля Уладзіміравіча Отчыка "На бранскай зямлі", прысвечанай 1025-годдзю хрышчэння Русі. У зале палацу мастак прадставіў вынікі сваёй творчай працы на двух міжнародных пленэрах. Першы міжнародны пленэр "Тут закаханага паэта вее лёгкая мара...", які адбыўся на радзіме знакамітага рускага паэта Ф.І. Цютчава - Аўстугу і быў прысвечаны 210-годдзю са дня нараджэння паэта, і XIV Міжнародны пленэр "Унеча - край натхнення" дазволілі мастаку раскрыць прыгажосць і непаўторнасць маляўнічых мясцін Браншчыны.
Анатоль Уладзіміравіч Отчык нарадзіўся 7 ліпеня 1949 г. у вёсцы Шыічы Калінкавіцкага раёна Гомельскай вобласці. Першыя навыкі ў выяўленчым мастацтве ён атрымаў у студыі пры Мазырскім народным тэатры імя Івана Мележа ў мастака Пятра Захарава. Скончыў Пензенскае мастацкае вучылішча імя К.А. Савіцкага, а затым Беларускі тэатральна-мастацкі інстытут. Анатоль Отчык з`яўляецца удзельнікам шматлікіх міжнародных, усесаюзных, замежных, рэспубліканскіх і абласных мастацкіх выстаў з 1978 г., а таксама 14 міжнародных пленэраў. Член Беларускага саюза мастакоў з 1986 г. За перыяд з 1989 па 2009 гг. было арганізавана 7 персанальных выстаў Анатоля Отчыка.
Работы Анатоля Отчыка знаходзяцца ў Нацыянальным мастацкім музеі Беларусі, фондах Беларускага саюза мастакоў, Музеі сучаснага выяўленчага мастацтва ў Мінску, музеі сусветнай спадчыны (Ганконг), фондах музея Гомельскага палацава-паркавага ансамбля, Бранскім мастацкім музеі, кіеўскім, брэсцкім і белгародскім мастацкіх музеях, ваенна-гістарычным музеі-запаведніку «Прохараўскае поле», рэчыцкім, чачэрскім, тураўскім і мазырскім музеях, у буда-кашалёўскай, светлагорскай і ўнечскай карцінных галерэях.
Мастак прысвяціў выставу "На бранскай зямлі" значнай для славянскіх зямель падзеі - 1025-годдзю хрышчэння Русі. У цудоўных карцінах, прадстаўленых на выставе, Анатоль Отчык адлюстраваў ціхую, паэтычную, непаўторную прыгажосць бранскіх храмаў і манастыроў, ачышчальнае святло гаючых святых крыніц, хараство вясковых краявідаў і цудоўныя панарамы, якія адкрываюцца з берагоў Дзясны. На выставе "На бранскай зямлі" беларускі мастак раскрывае гледачу сваю акрыленую і натхнёную святымі мясцінамі душу праз творы, напоўненыя адухоўленым сэнсам, і быццам запрашае на імгненне спыніцца і задумацца аб вечным...